تايم نيوز أوروبا بالعربي أخبار عالمية وعربية
مقالات مشابهة
تايم نيوز أوروبا بالعربي | أسماء المعرف
سيره ذاتيه سيره ذاتيه
هبعتهالك انت وهيه
هبعتها علشان تتفائلوا
وتعيشوا الدنيا الورديه
انا واحد خريج تربيه
ماجستير صحه نفسيه
أما مراتي رياض أطفال
قدمنا لدوله عربيه
علشان ايه؟
تحسين الحال
وحلمت بتعليم اولادي
ونوادي وبيتزا وكنتاكي
والمسبح في الحر يوماتي
والجو إنا مش حاسس بيه
أمال جايب التكييف ليه؟
علشان أنتخ واعمل بيه
حاجه جميله حياه آدميه
هانبلبط علي وش الميه
وهاناكل م الحلو ابو ليه
والمصريين يبقوا هناك
اجدع من أحسنها خوات
اتشجعنا وروحنا الشركه
علشان كان فيه لجنه هناك
شوفت كفيلي من الشباك
لابس ثوبه واحلي سواك
جنبه عصيره وطبق الماك
بطني قالت لي ايه وداك؟
قلت لبطني خلاص اتلمي
دا انا باعتبرك خالي وعمي
خلي دماغي يركز حبه
وبلاش يا اختي تفوري دمي
يومها وصلنا هناك بالثانيه
بس القاعده هناك حاجه تانيه
تاخد دورك وانت وحظك
سيبها لرب الدنيا الفانية
طبعا روحت لابله نجاه
واحنا بقلنا معاها ساعات
قلت يا ابله انا ظهري اتكسر
قالت ابشر فيها بيات
شوف لك واحد وتبات عنده
أمال فين البلديات؟
كل تخصص ياخد وقته
واحنا نموت في الرسميات
وكأننا بقي في الثانويه
وكمان مراقبه بكاميرات
حتي الاسئله مش طبيعيه
وكان زماله بريطانيه
مع اني مقدم شهادتي
تربيه وكمان المنوفيه
المفاجاه بقي أن نجحنا
ولينا مقابله شخصيه
ااااااه ع الفرحه
شايف الفرحه
نسيتنا كل الاحزان
سلمونا ورقه كبيره
وقالوا تتدبس في الاعلان
مراتي قالت اكتب انت
وريهم خط الفنان
بصوا لبعض باستغراب
العنوان دا بقاله سنين
بصينا لبعض انا وهيه
قولتلها بحسره وعصبيه
الاعلان ده شوفتيه فين
قالتلي طب ما انا قيلالك
كان علي قرطاس الطعميه
ضحكهم طبعا سمعينه انت وهيه
ورجعنا وبخيبه قويه
بس انا قلت أنا لازم اسجل
ده كله في سيره ذاتيه
وابعتهالك انت وهيه
أسماء طه المعرف
ماجستير صحه نفسيه
باحثه دكتوراه
