تايم نيوز أوروبا بالعربي أخبار عالمية وعربية
مقالات مشابهة
تايم نيوز هولندا | جمهورية مصر العربية
حق أميرة لازم يرجع وهذا كان الهاشتاغ الذي تداوله اكثر من موقع بالسوشل ميديا وكان ما يلي سياق ما كتب نقلناه لحضراتكم كما هو :
أميرة أجمل الناس اللي ممكن تقابلهم في حياتك..
الروح الجميلة والنقاء والبراءة والخجل اتجوزت وخلفت بنتين توأم ،جوزها طباعه صعبة وسيئة.وأميرة هادية جدًا وكانت بتستحمل وبتحاول تحتويه.لحد ما في مرة حاول يضرب بنت من البنتين.مستحملتش بنتها تاخد أي ضربه على جسمها. وحميتها ورا ضهرها واخدت الضرب كله بدالها. لحد ما ماتت من الضرب.ماتـــــت بجد.. مش تعبير مجازي.متخيل حد يموت من الضرب؟ متخيل الضرب كان شكله ايه؟
طب متخيل إن بنت من الاتنين اللي في الصورة دول كانت هتاخد هي الضرب ده كله؟
ولا صعب عليه شكل أميرة ولا عياط وصويت البنتين.ولما الجيران خبطوا عليها عشان يلحقوها، قل ادبه عليهم وشتمهم وقفل الباب في وشهم، ودخل كمل ضرب فيها (وشهادة العمارة كلها مثبتة في المحضر)
الجيران مكانوش متخيلين إن الموضوع هيوصل لكده، وكل واحد دخل شقته وقفل عليه بابه.
وهو دخل يكمل ضرب، وهي مصممة بإستماتة تقف حائط سد بينه وبين البنات، عشان مافيش حاجة تيجي عليهم. وتاخد هي الضرب كله.
وبعد ما خلص ضرب، سابها وقفل عليها باب الشقة بالمفتاح مع البنتين وهي بتتألم وتتوجع، ومش قادرة حتى تستنجد بحد، والبنتين في حالة من الهيستريا وهما شايفين امهم بالمنظر ده، وصغيرين جدااا لا هيعرفوا يتصلوا بحد ولا يستنجدوا بحد.فضلت اميرة تسخن وتورم، لحد ما جالها تسمم في الدم.وبعد معاناة حاولت تستنجد بصديقتها، واتنقلت للمستشفى.
لكن اتنقلت متأخر للأسف، ومستحملتش يا حبيبتي، وتوفت تاني يوم وصولها المستشفى. وحكت اللي حصلها لصديقتها قبل الوفاة.وللعلم: التقارير الطبية وتقارير المشرحة، بتقول إن اميرة جالها إلتهاب في الاوعية الدموية وجلطات ادت للتسمم في الدم.
و أسماء فخرالدين صديقتنا وزميلتنا، كانت ممشية الموضوع قانوني عشان تجيب حق أختها
واحنا احترمنا عدم رغبتها إننا نكتب عن أميرة واللي حصلها. وكانت واثقة إن العدالة هي اللي هتنتصر، لإن كل الأوراق والشهود والتقارير في صف أميرة.لكن المحامي بتاعه بيحاول يلاقي ثغرات عشان يخرجه. عشان كده محتاجين الموضوع يكون رأي عام.
ارجووكم فعلوا الهاشتاج عشان أميرة تستريح في مكانها، وعشان المجرم ده ياخد جزاؤه.
وعشان البنتين دول ميتربوش على ايد راجل مجرم زي ده.. متخيلين لو خرج هيكون ايه مصير البنتين دول؟ وهيتربوا ازاي؟
العرض على النيابة غدا..
