تايم نيوز أوروبا بالعربي | ميموريات ليندا
كان في مقدمة قائمة ضيوفي بـ ندوة مسلسل حديث الصباح والمساء ، وكانت في قاعة حزب الوفد بالدقي ،من زمن ياااما ، وبحكم انه كان البطل امام ليلي علوي وقبلها ادوار بشوات كتير( فالعين كانت عليه ) معلش هستخدم العامية شوية لان الحكاية تستدعي ذلك ( المهم )،
وانا واقفه بستقبل الضيوف كان حريص انه يحضر اول واحد فيهم وكان جاي بسيارة ٢٤ او ٢٨ وبصلي وقالي شفتي يا استاذة عربيتي الحلوة وضحك ضحكة قهر كده وكمل ، مفكرني باشا بجد من ادواري واهو حالي اقل أجر وعيشتي متواضعة زي ما حضرتك شايفه فبصتله وضحكت وطبطبت ع كفته وقلتله انت سيدهم كلهم العالم اللبش دي وغمزتله كده بصياعة وقلتله مش انت محترم ( اشرب بئا) فابتسم بحسرة وكمل كلامه وقال وادي علبه سجايري ( —-) اهي فهقهت وقلتله لا كده كتير اتفضل جوا هنسجر سوا مارلبورو وهقهقة عالية بينا وكان جميل وعفوف النفس رغم انه من اصل طيب ومش فقراء بس واضح انه كان من الناس اللي الزمن جار عليهم و كان بشوش جدا ووسط الضحك قالي اوعي تسيحيلي يا ليندا قلتله استاذة اسمي استاذة يا خلو وهسترية ضحك دا انت سايح لوحدك يا كبير، وهو متقبل وجميل وضحكنا كان من القلب ومسمع الدنيا كلها ك اب وبنته صحاب بجد، رغم اننا مكناش مقربين بس هو كان جميل ولما بيرتاح بيفضفض، وبعدين دخلنا كملنا كلام جانبي عن دور ليلي علوي لما الحصان رجله اتكسرت ومش هحكي اكتر من كده …
طبعا بحكي كل دا لانه مش سر والا كنت اعرضت عنه وكان مسموع وعدناه وسط حشود بشفافية وحب والرجل كان واضح وراضي ومتواضع …
والان راح عند الغني اللي بجد رب الكون وما فيه إنا لله و انا اليه راجعون استاذ احمد خليل يا راجل يا طيب زمااااان ما شفتك بس بحترمك واستمتعت بدورك في خيط حرير واعتقد انه كان اخر اعمالك ،رحمة الله عليك …