تايم نيوز أوروبا بالعربي أخبار عالمية وعربية
مقالات مشابهة
تايم نيوز اوروبا بالعربي | أسامة مطاوع الببلاوي
من ضيق الكتمان باصحابه
من سهرة ليل مصحوبه بدمع
من شمع مولع فى الاشواق
يخلص والاشواق ما بتخلصش
من وحدة في وسط الاهل
من غربه في داخل الروح
والغربه في داخل الروح مش سهل
تفتح في جروح وتبين كسراتك
وتعيش ولا قادر تمنع عسراتك
مساء الحزن ياحلوه في كل مكان
ياغنوه وبكت المبسوط
وقتلت فرحة الفرحان
مساء الحزن على قلبي اللي داق البعد
مساء بيتعجب على انه برغم غيابك مش بيسلم
وانه يوماتي يبات مكسور لكنه برضو ما اتعلم
ويارب تكوني سعيده
مليانه بفرحك وهناكي
انا لسه معشم قلبي بقربك
والى الان بستناكي
بستنا اشوفك
والضحكة اللي تزين وشك
والبسمه اللي مليها كسوفك
و شايفك برضو بتكملي روحي
بتنوري كل ظلام العالم فيا
تزرعي بستاني وارضي البور
تحييني في ايامي الجايه
وشايفك بكرا وكل حياتي وسنيني
يطول العمر مهما يطول علي بعدك
وبرضو انتي وحشتيني
ويارب تكوني فعلا كالعادة
عايشة ايامك بسعادة
مبسوطه ثابته قويه بجد
شخصيه ما تشبه غيرك حد
في رواقه تنامي وتصحي بدوني
لا تعكري دمك بيا
ولاانك تبقي كئيبه بلوني
تخرجي في الشلة براحتك
تاخدي مساحتك
تشربي كولا بدون ماامانع
تضحكي ويا صحابك عادي في وسط الشارع
مش هامك مين يسمع ولا مين مش سامع
وتروحي بالك مرتاح
جواكي براح
روحك مني بتصفيها
تفتحي شاتك ويا اصحابك وتقضيها
وان يحكوا عليا
تقفلي موضوعهم بهزارك
وتقولي اهو غار
وتعيش حياتك بعديها
رمياني في سلة أشعار
اكتب في قصايد وابعتلك في سلام ياما
سلام الحب ليكي
علي قتلك من المقتول
ومهما يصيبني داء بُعدك
لا غير الود اقدر اقول
ومش بسكت لو اسمع شئ يقال عنك
ولا يرضيني فيكي إلا الخير
وغير الخير مفيش
ولو جت كل الجراح منك
انا اجرح روحي مااجرحكيش
لكن فعلا انا بهلك
ومستهلك في كل اوقات تعدي عليا من دونك
وكل مكان بشوفه خراب
مادام مابشوفش بعيونك
انا مكمل علي طيفك وعلى الذكرى
وفاكر كل تفاصيلك لو انتي حتى مش فاكره
ادور فيا على روحك
واشوفك في جميع الناس
واعيد في عهود من الذكريات بيكي
واطلع عود والحن علي الورق احساس
وافتح شات كان بينا قديم
اقرا في كلمات واضحك وابكي
والاقيني في اخر السهرة حزين
تاخدني همومي
واتغرب وروحي بعيد
انام واقوم وبتعذب وقلبي شريد
بقيت حزين وملامحي زي الناي
معرفش ليه وبعدنا بس ازاي
بتعدي عليا ليالي مش قابل اعيش فيا
ولا قادر افضي في روحي مكان منك
ولا عنك انا قادر اتوب
معرفش ان كان افضلي اني افارقك
ولا دا ذنب وكان مكتوب
انا مابلومش عليكي انك اجمل من اجمل حد عرفته في يوم
وان انتي ملازي واملي وراحتي
وان انتي براح وسلام وسكون
كل اللي انا مش عارفه بجد
ازاي سبتيني اغرق
كان بيدك تصبري حبه
ترميلي القشه
ونشوفنا انا وانتي مابين اطفال
قاعدين نحكي ونتعشى
واقولك انك اجمل ست
شيلانه جمبي وسانداني
وان انا صعب في عشتي أوقات
لكن بلاقكي شرياني
وان انتي في مصنع روحي انتاج
وان مقام هنا على الراس
تتلبسي كتاج
انا لومي عليكي انك عرفاني بخاف من البحر
فازاي تحدفي علي قلبي امواج
وليه بشتاقلك؟!
وليه بشوفك وانتي عني بعيد؟!
وليه برغم انتهاء القصة بحبك؟
بحبك اكتر من جديد
وكانك شئ من روحي
وكأنك جين من تكويني
انام احلم بيكي
اصحي ملاقيكيش
الاقيني بنام لاجل تجيني
اخر كلام بطرح سلام ليكي
سلام للشعر يوصفلك
غرامي وشوقي لعنيكي
سلام للشعر لو حبك
وشاف انك بتحييني
ولسه باقي على حبك
برغم انك فارقتيني
